Нагадаем, раней Януш Гаўрылюк заявіў, што «час зноў увайсці ў партызанскую пазіцыю».
Паводле ягоных слоў, гэтаму рашэнню паспрыяла адсутнасць зацікаўленасці з боку фармальнага арганізатара — «Фільматэкі» (польскай дзяржустановы, якая захоўвае і папулярызуе аўдыёвізуальную спадчыну).
Другая прычына — эстонскі фестываль Northern Lights зноў паказвае ў Варшаве беларускія фільмы непасрэдна перад датамі «Бульбамуві».
«Таму паказваць тыя ж фільмы праз два тыдні ўжо не мае сэнсу», — лічыць стваральнік кінафестывалю.
Таксама, паводле слоў Гаўрылюка, цяпер мала новых беларускіх фільмаў і абмежаваны доступ да кінастужак, знятых у Беларусі.
«Бульбамуві» — фестываль беларускіх відэа- і кінафільмаў, які праводзіцца з 2011 года па ініцыятыве часткі беларускіх кінематаграфістаў і культуролагаў як альтэрнатыва дзяржаўным кінафестывалям у Беларусі.
Пасля 2020 года «Бульбамуві» стаў галоўнай міжнароднай вітрынай для незалежных беларускіх стужак, якія закранаюць вострыя сацыяльныя і палітычныя тэмы.
У 2024 годзе фестываль адбываўся ў кінатэатры «Ілюзіён» у Варшаве.
«Дзякуем усім аўтарам, партнёрам і гледачам за падтрымку на працягу ўсіх гэтых гадоў і ўжо цяпер запрашаем усіх на „Пахаванне Bulbamovie“, якое адбудзецца неўзабаве! Хутка паведамім падрабязнасці», — паабяцаў Гаўрылюк.
