Для каго:

Жанчыны, якія заснавалі або сузаснавалі кампанію ці арганізацыю з прарыўнай інавацыяй — ад deep tech і STEM да аховы здароўя, клімату і лічбавых рашэнняў. Падавацца могуць тыя, хто:

• Легальна жыве ў краіне ЕС (у тым ліку ў заморскіх краінах і тэрыторыях) або ў краіне, асацыяванай з Horizon Europe;
• Заснавала або сузаснавала кампанію ці арганізацыю, зарэгістраваную ў адной з гэтых краін да 1 студзеня 2025 года;
• Падаецца як фізічная асоба, а не ад імя кампаніі;
• Яшчэ не атрымлівала прэмію ЕС або Euratom за тую ж дзейнасць.

Прэмія адкрытая для жанчын ва ўсёй іх разнастайнасці: паводле правілаў, гэта цыс-жанчыны і трансжанчыны, юрыдычна прызнаныя жанчынамі. Спіс асацыяваных краін — у дакуменце Еўракамісіі.

Не могуць падавацца:

• Самазанятыя;
• Калектывы: калі ў кампаніі некалькі заснавальніц, кожная падаецца асобна.

Падацца можна толькі ў адну катэгорыю — калі заявак некалькі, разгледзяць толькі апошнюю.

Катэгорыі:

• Women Innovators — для заснавальніц і сузаснавальніц без узроставых абмежаванняў;
• Rising Innovators — для інаватарак, маладзейшых за 35 гадоў (народжаных 1 студзеня 1991 года або пазней);
• EIT Women Leadership — для жанчын, звязаных з супольнасцю EIT: напрыклад, калі ваша кампанія атрымлівала падтрымку ад інавацыйнай супольнасці EIT (KIC) або вы скончылі адукацыйную праграму з лэйблам EIT.

Што прапануецца:

• Women Innovators — 100 000 EUR, 70 000 EUR і 50 000 EUR за першае, другое і трэцяе месцы;
• Rising Innovators і EIT Women Leadership — 50 000 EUR, 30 000 EUR і 20 000 EUR;
• Еўрапейскае прызнанне і бачнасць для вас і вашай кампаніі.

Грошы выплачваюць пасля цырымоніі ўзнагароджання, калі пададзеныя ўсе патрэбныя дакументы. Калі ў некалькіх заявак аднолькавы вынік, прэмію за гэтае месца дзеляць пароўну.

Што чакаецца ад удзельніц:

• Распавядаць пра прэмію і яе вынікі СМІ і публіцы;
• Пазначаць падтрымку ЕС у камунікацыі пра прэмію: эмблема ЕС, звестка пра фінансаванне і афіцыйны дысклеймер;
• Арганізатары(-кі) могуць выкарыстоўваць неканфідэнцыйную інфармацыю і матэрыялы (фота, відэа) для сваёй камунікацыі.

Для заяўкі патрэбныя:

• Part A — адміністрацыйная інфармацыя, запаўняецца анлайн;
• Part B — апісанне па шаблоне з сістэмы падачы, да 15 старонак, у PDF;
• Відэазварот да 90 секунд пра сябе і свае дасягненні — да 100 МБ, у ZIP-архіве;
• Для Rising Innovators — пацверджанне ўзросту ў PDF;
• Для EIT Women Leadership — дакумент пра сувязь з супольнасцю EIT у PDF: сертыфікат або пагадненне пра падтрымку ад KIC, дыплом праграмы з лэйблам EIT;
• Асабісты 9-значны код PIC — яго атрымліваюць пры рэгістрацыі ў Participant Register як фізічная асоба.

Заяўку можна падаць на любой афіцыйнай мове ЕС, але арганізатары(-кі) раяць англійскую; кароткае апісанне праекта — заўсёды па-англійску. Пазней могуць папрасіць дадатковыя дакументы — напрыклад, для праверкі статусу або банкаўскага рахунку.

Як падавацца:

Праз Funding & Tenders Portal, на старонцы сваёй катэгорыі. Спачатку стварыце акаўнт EU Login і зарэгіструйцеся ў Participant Register як фізічная асоба — заяўкі з PIC кампаніі адхіляюць. Рэгістрацыю трэба прайсці да дэдлайну.

Пасля падачы прыходзіць ліст-пацверджанне; калі яго няма, заяўка не пададзеная. Да дэдлайну заяўку можна змяняць і падаваць нанова. Усе ўмовы — у Rules of Contest.

Адбор:

• Прарыўная інавацыя — чым рашэнне вашай кампаніі адрозніваецца ад існуючых, у тым ліку ў deep tech і STEM;
• Уплыў — якую рэальную праблему вырашае інавацыя і які сацыяльна-эканамічны або экалагічны эфект кампанія дае ўжо цяпер (дабрабыт, адукацыя, прыбытак, працоўныя месцы);
• Натхненне — ваша ключавая роля ў поспеху кампаніі і тое, як вы падтрымліваеце іншых жанчын і дзяўчат: напрыклад, працуеце на гендарны баланс у камандзе або на роўны доступ да фінансавання, сетак і адукацыі.

За кожны крытэрый ставяць да 10 балаў, мінімум — 6; агульны мінімум — 18 з 30. Калі ў катэгорыі больш за 500 заявак, спачатку праходзіць папярэдні адбор. Да шасці лепшых кандыдатак у кожнай катэгорыі запрашаюць на слуханне з журы ў Брусэлі — яно можа прайсці і анлайн. Журы ацэньвае абедзве часткі заяўкі і відэа.

Таймлайн:

• Снежань 2026 – красавік 2027 года — ацэнка заявак;
• Красавік – чэрвень 2027 года — вынікі;
• Другі квартал 2027 года — цырымонія ўзнагароджання.

Кантакт:

• Women Innovators і Rising Innovators — EISMEA-WIP@ec.europa.eu;
• EIT Women Leadership — eit-awards@eit.europa.eu.

У лісце пазначце код конкурсу і катэгорыю. Пытанні пра сістэму падачы — у IT Helpdesk партала.

Арганізатар:

European Innovation Council (EIC) разам з агенцтвам EISMEA — катэгорыі Women Innovators і Rising Innovators; European Institute of Innovation and Technology (EIT) — катэгорыя EIT Women Leadership. Прэмію фінансуюць з праграмы Horizon Europe.