Для каго:

Міжнародныя куратары(-кі) сучаснага мастацтва — незалежныя або тыя, хто працуе з інстытуцыямі. Праграма падыходзіць, калі вы:

• Можаце правесці ў Дубліне не менш за тры і не больш за чатыры тыдні;
• Маеце пераканаўчае партфоліа і больш за пяць гадоў досведу і/або працуеце над значным праектам, звязаным з рэзідэнцыяй;
• Развіваеце куратарскае даследаванне, практыку або сувязі, звязаныя з Дублінам ці Ірландыяй.

Калі:

Ад трох да чатырох тыдняў у Дубліне, у Fire Station Artists' Studios. Рэзідэнцыі пачнуцца ў канцы студзеня або на пачатку лютага 2027 года; два зручныя тэрміны вы прапануеце ў заяўцы.

Што прапануецца:

• Бясплатнае пражыванне ў жылой студыі-майстэрні ў гістарычнай паўночнай частцы цэнтра Дубліна;
• Стыпендыя 300 EUR на час рэзідэнцыі;
• Свой графік студыйных візітаў да рэзідэнтаў(-так) FSAS і іншых людзей з культурнай сферы — яго можна скласці загадзя;
• Пры патрэбе — дапамога каманды FSAS са знаёмствамі з мастакамі(-чкамі), куратарамі(-камі), інстытуцыямі і галерэямі ў Дубліне і па ўсёй Ірландыі;
• Магчымасць шукаць міжнародныя выставачныя праекты з ірландскімі мастакамі(-чкамі).

Што чакаецца ад удзельнікаў(-ц):

• Кароткае публічнае выступленне ў FSAS у пачатку рэзідэнцыі: вы расказваеце пра сваю практыку і знаёміцеся з мастакамі(-чкамі) з Дубліна і не толькі;
• Студыйныя візіты да мастакоў(-чак) FSAS і ўдзел у падзеях FSAS, якія адбываюцца падчас вашага знаходжання;
• Кароткая справаздача ў канцы рэзідэнцыі — для ўнутранай ацэнкі праграмы;
• Арганізатары(-кі) просяць прывезці публікацыі або выставачныя матэрыялы пра вашы нядаўнія праекты і, калі магчыма, параіць актуальную літаратуру для бібліятэкі FSAS.

Для заяўкі патрэбныя:

• Тэкст пра вашу практыку і матывацыю: чаму вас цікавіць рэзідэнцыя і як ваша даследаванне звязанае з ірландскім візуальным мастацтвам;
• CV — да 3 старонак;
• Дакументацыя аднаго-двух нядаўніх праектаў;
• Два зручныя тэрміны візіту ў 2027 годзе — ад канца студзеня;
• Кароткая біяграфія (да 100 слоў) і выява з подпісам (300 dpi) — для анонсу, калі вас абяруць;
• Калі патрэбна, асобны аднастаронкавы дакумент пра вашы патрэбы ў даступнасці.

Як падавацца:

Сабярыце матэрыялы ў адзін PDF і дашліце на apply@firestation.ie з тэмай «International Curator Residency». Перад падачай арганізатары(-кі) раяць азнаёміцца з рэзідэнтамі(-ткамі) і праграмай FSAS.

Адбор:

Заяўкі ацэньваюць паводле крытэрыяў:

• Прафесійная куратарская практыка;
• Якасць працы;
• Развіццё куратарскага даследавання, практыкі або сувязяў у Дубліне і Ірландыі;
• Патрэба ў рэзідэнцыі — як яе апісвае заяўнік(-ца) і як яе бачыць камісія;
• Гатоўнасць узаемадзейнічаць з супольнасцю FSAS.

Сёлета ў адборачную камісію разам з камандай FSAS увайшоў мастак Rouzbeh Shadpey. Колькасць месцаў ва ўмовах не пазначаная; у 2026 годзе рэзідэнтамі сталі шэсць куратараў(-рак).

Кантакт: пытанні пра рэзідэнцыю і падачу — clara@firestation.ie.

Арганізатар:

Fire Station Artists' Studios (FSAS) — цэнтр падтрымкі візуальных мастакоў(-чак) у паўночна-ўсходняй частцы цэнтра Дубліна, працуе з 1993 года. Тут ёсць дзесяць субсідаваных жылых студый для ірландскіх і замежных мастакоў(-чак) і вялікая скульптурная майстэрня. FSAS асабліва падтрымлівае сацыяльна ангажаваныя мастацкія практыкі.