Праграма мае два кірункі:

• Track I — Academic/Research Award: студэнты(-кі) бакалаўрыята, магістратуры або аспірантуры Georgetown University ці любога іншага акрэдытаванага ўніверсітэта, а таксама постдокі — як правіла, не больш за пяць гадоў пасля атрымання доктарскай ступені;
• Track II — Human Rights and Rule of Law Fellowship Award: людзі з пацверджаным досведам працы, звязанай з Беларуссю, у сферы правоў чалавека, аховы навакольнага асяроддзя або вяршэнства права — у тым ліку з удзелам у значных унутраных ці міжнародных судовых працэсах. Можна падацца самастойна або быць намінаваным(-ай) кімсьці іншым — з вашай згоды.

Беларускае грамадзянства — перавага, але не абавязковая ўмова. Афіліяцыя з Georgetown University не патрабуецца. Асабліва чакаюць заявак ад людзей, звязаных з Еўрапейскім гуманітарным універсітэтам (EHU), — тых, хто зараз там вучыцца ці працуе, або мае дыплом EHU.

Пра праграму:

Мэта ініцыятывы — сур'ёзныя даследаванні, на якія можна спасылацца, пра сучасную Беларусь, іх прэзентацыя ва ўніверсітэтах і аналітычных інстытуцыях, а ў перспектыве — стварэнне пастаяннай прафесуры беларусазнаўства (endowed professorship), напрыклад у Georgetown.

Тэмы:

Праекты ў Track I павінны датычыцца актуальных пытанняў унутранай і знешняй палітыкі Беларусі (у тым ліку адносін з ЕС, Украінай і ЗША), дзяржаўнага кіравання, грамадскай думкі і сацыялогіі — з акцэнтам на рэалістычныя сцэнарыі будучыні пасля Лукашэнкі, напрыклад у дэмаграфіі.

Жорстка тэмы не задаюць, але называюць кірункі, якія асабліва цікавяць:

• Дэмакратычная Беларусь у рамках АБСЕ: незалежнасць судоў, выбарчае права, падсправаздачнае кіраванне, абарона меншасцяў, грамадзянскі кантроль над сілавымі структурамі; для Track II — дакументаванне таго, як цяперашні рэжым парушае прававыя стандарты і правы чалавека;
• Гандлёвая і інвестыцыйная інтэграцыя з Еўропай — у параўнанні з досведам Малдовы, Украіны, краін Балтыі і Цэнтральнай Еўропы;
• Грамадзянства і беларуская дыяспара — як будаваць трывалыя адносіны паміж дзяржавай і дыяспарай;
• Беларуская ідэнтычнасць ва ўсёй яе складанасці — у тым ліку антысемітызм, Халакост і калабарацыя, савецкія рэпрэсіі, паланізацыя і русіфікацыя.

Ініцыятыва чакае грунтоўных даследаванняў з празрыстымі метадамі, а не адвакацыі пад выглядам навукі. Праекты па-за гэтымі тэмамі таксама разглядаюць, калі ў заяўцы паказана, чаму праца важная і для якой аўдыторыі.

Што прапануецца:

Дзве паралельныя ўзнагароды па 2000 USD ≈ 1780 EUR — у кірунках Track I і Track II. Грошы выплачваюць у два этапы:

• 1000 USD ≈ 890 EUR — пасля адбору;
• 1000 USD ≈ 890 EUR — пасля завяршэння працы і яе прэзентацыі.

У апісанні не пазначана, ці пакрываюцца дарога і іншыя выдаткі, звязаныя з прэзентацыяй.

Што чакаецца ад удзельнікаў(-ц):

• Кароткае інтэрв'ю на этапе адбору;
• Завяршыць пісьмовую працу і прадставіць яе — асабіста або дыстанцыйна — на падзеі адпаведнай адукацыйнай або некамерцыйнай інстытуцыі, зацверджанай ініцыятывай;
• Тэрмін вызначаюць індывідуальна, але не пазней чым праз шэсць месяцаў пасля атрымання сродкаў.

Для заяўкі ў Track I патрэбныя:

• Даследчая прапанова на 1000–1200 слоў — з указаннем, адкуль вы даведаліся пра праграму;
• Дзве рэкамендацыі;
• Актуальнае CV;
• Акадэмічная выпіска з адзнакамі (transcript);
• Узор вашага тэксту (writing sample).

Для заяўкі або намінацыі ў Track II патрэбныя:

• Тэкст на 1000–1200 слоў пра працу кандыдата(-кі) і адпаведную справу, працэс або ініцыятыву — з указаннем, адкуль вы даведаліся пра праграму;
• Дзве рэкамендацыі;
• CV або прафесійная біяграфія;
• Пацвярджальныя дакументы — калі ёсць;
• Узор тэксту — калі ёсць.

Дэдлайн:

Афіцыйнага дэдлайну няма. Прыём заявак і намінацый адкрыты з 1 верасня 2026 года, інтэрв'ю праводзяць па меры паступлення заявак, таму падавацца варта як мага хутчэй. Пераможцаў абвесцяць не пазней за 7 снежня 2026 года.

Як падавацца:

Дашліце матэрыялы на ethansb@karski-swyer-belarus-initiative.org з копіяй на esb34@georgetown.edu.

Арганізатар: Karski-Swyer Initiative to Promote Belarusian Studies (Karski-Swyer Belarus Initiative), ЗША.