M+ Sigg Fellowship 2026/27 — 200 000 HKD на даследаванне кітайскага мастацтва
Sigg Fellowship for Chinese Art Research — даследчая стыпендыя музея візуальнай культуры M+ у Ганконгу. Гэты выпуск прысвечаны сувязі традыцыйнага і сучаснага ў кітайскіх мастацкіх практыках з 1980-х гадоў: якую ролю кітайская традыцыя адыгрывае ў сусветнай мастацкай вытворчасці і арт-сістэме і як пераасэнсаваць суб'ектнасць мастака(-чкі). Магчымыя кірункі — роля мастацтва тушшу, пераацэнка мастацтвазнаўчай тэрміналогіі, узаемадзеянне мастацтва і рамяства, малавывучаныя кейсы. Праект павінен быць прысвечаны візуальным мастацтвам і грунтавацца на новым даследаванні або развіваць ранейшае, вынікі якога яшчэ не былі апублікаваныя. Перавагу аддаюць цалкам новым праектам.
Для каго:
- Даследчыкі(-цы) і даследчыя групы з любой краіны, без узроставых абмежаванняў;
- Трэба мець ступень магістра(-кі) або вышэйшую ў адпаведнай галіне — або ступень бакалаўра(-кі) і не менш за 3 гады адпаведнага прафесійнага ці акадэмічнага досведу;
- Трэба добра валодаць кітайскай або англійскай — вусна і пісьмова.
Што прапануецца:
- Грант 200 000 HKD ≈ 22 700 EUR — на ўсе выдаткі: дарогу, жыццё, страхоўку і даследаванне;
- Праца пры M+ ад 3 да 6 месяцаў;
- Доступ да калекцый M+ на месцы і анлайн, да бібліятэкі і архіваў;
- Дыскусіі з куратарамі(-камі) і іншымі супрацоўнікамі(-цамі) музея.
Што чакаецца ад удзельнікаў(-ц):
- Развіць праект у адказ на даследчую тэму;
- Зрабіць некалькі ўнутраных прэзентацый у музеі;
- Прачытаць публічную лекцыю ў Ганконгу;
- Напісаць эсэ для M+ Magazine — не менш за 7 500 знакаў па-кітайску або 5 000 слоў па-англійску;
- Даць M+ эксклюзіўнае прыярытэтнае права апублікаваць вынікі даследавання.
Для заяўкі патрэбныя (па-англійску або па-кітайску):
- Даследчая прапанова — да 1 000 слоў;
- Поўнае CV: адукацыя, прафесійны досвед, узнагароды, публікацыі;
- Два рэкамендацыйныя лісты (акадэмічныя або прафесійныя) — рэкамендатары(-кі) дасылаюць іх у M+ самі.
Як падавацца:
Прапанову і CV трэба загрузіць праз Google-форму. Рэкамендацыйныя лісты і пытанні — на адрас M+, пазначаны на старонцы стыпендыі; тэма ліста: «[M+ Sigg Fellowship 2026/27 Application] SURNAME, First name».
Арганізатар: M+, Ганконг. Журы: Peggy Wang (Bowdoin College), Ying Kwok (M+) і Wu Mo (M+).