Для каго:

Кансорцыумы арганізацый, якія гатовыя стварыць і весці агульнаеўрапейскі механізм хуткага рэагавання ў абарону свабоды медыя і бяспекі журналістаў і журналістак.

• Падаваць заяўку могуць некамерцыйныя арганізацыі (прыватныя або публічныя), міжнародныя арганізацыі, універсітэты, адукацыйныя ўстановы і даследчыя цэнтры — у любой камбінацыі;
• Кожны заяўнік павінен быць юрыдычнай асобай, заснаванай у краіне — удзельніцы Creative Europe: у краінах ЕС (уключна з заморскімі краінамі і тэрыторыямі), у краінах ЕЭП са спісу або ў краінах, асацыяваных з праграмай;
• На міжнародныя арганізацыі правілы пра краіну рэгістрацыі не распаўсюджваюцца;
• Кансорцыум — мінімум дзве незалежныя арганізацыі з дзвюх розных краін — удзельніц праграмы; афіліяваныя арганізацыі ў гэты мінімум не залічваюцца;
• Арганізацыі з краін, якія толькі вядуць перамовы пра далучэнне да праграмы, могуць падавацца, але грантавую дамову падпішуць, толькі калі перамовы скончацца да падпісання і пагадненне пакрые гэты конкурс;
• Арганізацыі без статусу юрыдычнай асобы могуць удзельнічаць у выключных выпадках — калі іх прадстаўнікі(-цы) могуць браць на сябе юрыдычныя абавязацельствы і даюць гарантыі, роўныя гарантыям юрыдычных асоб.

Не могуць падавацца:

• Фізічныя асобы;
• Органы ЕС (акрамя Joint Research Centre Еўракамісіі);
• Арганізацыі пад абмежавальнымі мерамі (санкцыямі) ЕС — ні ў якой ролі;
• Арганізацыі пад мерамі паводле Рэгламенту ЕС 2020/2092 — цяпер гэта венгерскія public interest trusts, створаныя паводле Закона IX 2021 года, і арганізацыі, якія яны ўтрымліваюць.

Фармат:

• Праект звычайна доўжыцца да 24 месяцаў. Падоўжыць яго можна праз змену дамовы, калі гэта абгрунтавана;
• Механізм павінен ахопліваць усе краіны ЕС, краіны — удзельніцы Creative Europe і краіны-кандыдаты;
• Праца над праектам звычайна пачынаецца пасля падпісання грантавай дамовы;
• Заяўку можна напісаць на любой афіцыйнай мове ЕС, але анатацыя праекта — абавязкова па-англійску; агенцтва раіць пісаць па-англійску ўсю заяўку.

Што прапануецца:

• Агульны бюджэт конкурсу — 3 000 000 EUR. Верхняга ліміту на адзін праект няма;
• Грант пакрывае 90% прымальных выдаткаў, астатнія 10% кансорцыум пакрывае з іншых крыніц;
• Прымальныя выдаткі: персанал, субпадрад, падарожжы і пражыванне, абсталяванне (праз амартызацыю), іншыя тавары і паслугі, фінансавая падтрымка трэціх асоб. Ускосныя выдаткі — фіксаваныя 7% ад прамых;
• Аванс — звычайна 70% максімальнай сумы гранта, праз 30 дзён пасля ўступлення дамовы ў сілу (або пасля гарантыі, калі яе патрабуюць); прамежкавых плацяжоў няма, рэшту разлічваюць пасля заканчэння праекта;
• Можна аплаціць удзел у kick-off-сустрэчы ў Брусэлі: дарогу для двух чалавек і адну ноч пражывання, калі сустрэча адбываецца пасля даты пачатку праекта.

Што чакаецца ад удзельнікаў(-ц):

• Стварыць і весці агульнаеўрапейскі механізм хуткага рэагавання для абароны свабоды медыя і бяспекі журналістаў(-ак);
• Даваць юрыдычную і практычную дапамогу журналістам(-кам) і іншым медыяпрацаўнікам(-цам), якім пагражаюць: кансультацыі, юрыдычная падтрымка, прытулак, лагістыка, пры патрэбе — фінансавая дапамога; падтрымка падбіраецца пад кожны выпадак;
• Ладзіць адвакацыйныя місіі і візіты ў месцы, дзе журналістам(-кам) пагражаюць, і праз адвакацыю супрацьстаяць беспакаранасці;
• Сістэматычна маніторыць парушэнні свабоды прэсы і медыя ў краінах ЕС, краінах — удзельніцах Creative Europe і краінах-кандыдатах: публікаваць алерты на асобным сайце і рэгулярныя справаздачы пра асноўныя тэндэнцыі; маніторынг павінен даваць ранняе папярэджанне пра парушэнні;
• Праводзіць інфармацыйныя кампаніі пра свабоду медыя і бяспеку журналістаў(-ак);
• Займацца камунікацыяй і распаўсюдам вынікаў, а таксама маніторынгам і ацэнкай самога праекта;
• Арганізаваць працу па працоўных пакетах: кіраванне праектам, асноўная дзейнасць і распаўсюд абавязковыя, іншыя можна дадаць.

Фарматы дзейнасці могуць быць розныя: канферэнцыі і семінары, навучанне (у тым ліку па бяспецы і кібербяспецы), сеткі і абмен практыкамі, лічбавыя інструменты, даследаванні і мапінг, юрыдычная і практычная дапамога, адвакацыйныя місіі, фінансавая падтрымка трэціх асоб.

Фінансавую падтрымку трэцім асобам можна даваць да 60 000 EUR на аднаго атрымальніка і толькі на два віды падтрымкі: прамую дапамогу журналістам(-кам) пад пагрозай (выдаткі на бяспеку або юрыдычныя выдаткі) і разавую падтрымку НДА, якія працуюць у сферы свабоды медыя і бяспекі журналістаў(-ак). Атрымальнікі — журналісты(-кі) і медыяпрацаўнікі(-цы) як фізічныя асобы або НДА.

Для заяўкі патрэбныя:

• Частка A — адміністрацыйныя звесткі пра ўдзельнікаў і зводны бюджэт (запаўняецца анлайн);
• Частка B — тэхнічнае апісанне праекта па шаблоне з сістэмы падачы, да 50 старонак, у PDF; старонкі звыш ліміту ацэнкі не разглядаюць;
• Частка C — дадатковыя даныя пра праект і яго ўклад у ключавыя паказчыкі праграмы (запаўняецца анлайн);
• Код PIC для кожнага бенефіцыяра, афіліяванай арганізацыі і асацыяванага партнёра;
• Профілі (кваліфікацыя і досвед) людзей, якія будуць кіраваць праектам і рэалізоўваць яго, і апісанне ўдзельнікаў кансорцыума;
• Калі ў праекце ёсць афіліяваныя арганізацыі — дакументы пра іх сувязь з заяўнікам;
• Калі плануецца фінансавая падтрымка трэціх асоб — поўны пералік відаў падтрымкі, катэгорыі атрымальнікаў, крытэрыі выбару і максімальная сума для кожнага.

Абавязковых дадаткаў да заяўкі няма.

Як падавацца:

Толькі праз сістэму падачы на EU Funding & Tenders Portal(знешні сайт). Спачатку ўсім удзельнікам трэба стварыць рахунак EU Login і зарэгістраваць арганізацыю ў Participant Register, каб атрымаць 9-значны код PIC. Карыстайцеся формамі ўнутры сістэмы падачы — дакументы на старонцы конкурсу толькі для азнаямлення. Пасля падачы прыходзіць ліст-пацверджанне: калі яго няма, заяўка не пададзеная. Да дэдлайну заяўку можна змяняць і падаваць нанова.

Адбор:

• Заяўкі ацэньвае камісія з удзелам незалежных экспертаў(-ак);
• Рэлевантнасць — да 30 балаў (у тым ліку геаграфічны ахоп: як мага больш краін);
• Якасць зместу і дзейнасці — да 30 балаў (метадалогія, арганізацыя, графік і маніторынг);
• Кіраванне праектам — да 20 балаў (эканамічная эфектыўнасць, адпаведнасць рэсурсаў мэтам);
• Распаўсюд — да 20 балаў (уплыў і распаўсюд вынікаў);
• Прахадны бал — 70 з 100; фінансуюць у межах бюджэту, пры роўных балах вырашаюць балы за рэлевантнасць, потым за распаўсюд, потым за якасць зместу.

Таймлайн:

• Ацэнка — люты–травень 2027 года (арыенціровачна);
• Вынікі — ліпень 2027 года (арыенціровачна);
• Падпісанне грантавай дамовы — кастрычнік 2027 года (арыенціровачна).

Кантакт:

Пытанні не пра IT — на EACEA-CREATIVE-EUROPE-MEDIA-FREEDOM@ec.europa.eu, з кодам конкурсу CREA-CROSS-2027-MFP у лісце. Тэхнічныя пытанні пра сістэму падачы — у IT Helpdesk партала.

Арганізатар:

Еўрапейская камісія, праграма Creative Europe (кірунак Cross-sectoral). Конкурсам кіруе European Education and Culture Executive Agency (EACEA).

Важна:

• Конкурс залежыць ад канчатковага зацвярджэння бюджэту ЕС на 2027 год: пры істотных зменах яго могуць змяніць або скасаваць;
• Грант кампенсуе толькі рэальна панесеныя прымальныя выдаткі, а не запланаваныя, і не можа прыносіць прыбытак; 10 % выдаткаў кансорцыум пакрывае сам;
• Кансорцыумная дамова абавязковая;
• Фінансавую здольнасць каардынатара правяраюць, калі гэта не публічная ці міжнародная арганізацыя; пры слабых паказчыках могуць патрабаваць банкаўскую гарантыю на аванс, падзяліць аванс на часткі або адмовіць у ім;
• Субпадрад больш за 30% прымальных выдаткаў трэба абгрунтаваць у заяўцы;
• Адна і тая ж дзейнасць не можа атрымаць два гранты з бюджэту ЕС;
• Арганізацыі, якія прымаюць Creative Europe Desks, могуць быць каардынатарамі або бенефіцыярамі, толькі калі выразна раздзяляюць выдаткі паміж грантамі;
• Калі вы выкарыстоўваеце генератыўны ШІ, трэба праверыць увесь змест і ў заяўцы раскрыць, якія інструменты і як выкарыстоўваліся;
• Назвы бенефіцыяраў, адрасы, мэта і сума гранта публікуюцца; ад публікацыі можна адмовіцца толькі па абгрунтаваным запыце, калі яна пагражае правам і свабодам.