Для каго:

Юрыдычныя асобы (публічныя і прыватныя), зарэгістраваныя ў краінах — удзельніцах Creative Europe: у краінах ЕС (разам з заморскімі краінамі і тэрыторыямі), а таксама ў краінах ЕЭП і іншых краінах, асацыяваных з праграмай. Міжнародныя арганізацыі могуць падавацца незалежна ад краіны.

Падаецца кансорцыум мінімум з 3 незалежных арганізацый з 3 розных краін. У яго могуць уваходзіць камерцыйныя і некамерцыйныя, публічныя і прыватныя арганізацыі: арганізацыі, якія займаюцца медыяграматнасцю, органы ўлады (нацыянальныя, рэгіянальныя, мясцовыя), універсітэты і адукацыйныя ўстановы, медыя, арганізацыі ў сферы information integrity (надзейнасці інфармацыйнай прасторы), даследчыя і тэхналагічныя інстытуцыі, тэхналагічныя кампаніі.

Не могуць падавацца:

• Фізічныя асобы — акрамя самазанятых, у якіх бізнес не мае асобнай юрыдычнай асобы;
• Органы ЕС;
• Арганізацыі, да якіх ЕС ужывае рэстрыкцыйныя меры.

Фармат:

Праект звычайна доўжыцца да 24 месяцаў; падоўжыць яго можна, калі гэта абгрунтавана. Дзейнасць павінна адбывацца ў краінах — удзельніцах праграмы. Заяўку можна напісаць на любой афіцыйнай мове ЕС, але рэзюмэ праекта — заўсёды па-англійску. Арганізатары настойліва раяць пісаць па-англійску ўсю заяўку.

Што прапануецца:

• Грант да 500 000 EUR на праект;
• Грант пакрывае 70% прымальных выдаткаў.

Агульны бюджэт конкурсу — 3 500 000 EUR.

Грант можна выкарыстаць на:

• Шматмоўны або мультыкультурны кантэнт і кампаніі, у тым ліку інтэрактыўныя, якія развіваюць лічбавыя навыкі людзей, разуменне медыяпрасторы і ўстойлівасць да дэзынфармацыі;
• Распрацоўку і ўкараненне інструментаў медыяграматнасці і іншых інавацыйных рашэнняў — з прататыпамі, але праект не можа быць толькі IT-распрацоўкай;
• Навучанне для грамадзян(-ак), педагогаў(-інь) і стваральнікаў(-ніц) кантэнту, абмен практыкамі паміж краінамі, мовамі і культурамі;
• Публічныя падзеі і варкшопы;
• Ініцыятывы супольнасцяў, якія адаптуюць інструменты і матэрыялы медыяграматнасці і робяць іх даступнымі.

Што чакаецца ад удзельнікаў(-ц):

Кожны праект мае:

• Дапамагаць людзям крытычна ставіцца да медыя, распазнаваць дэзынфармацыю і маніпуляцыі і рэагаваць на іх — асабліва па-за сістэмай адукацыі;
• Улічваць змены ў медыяпрасторы: новыя спосабы ствараць і спажываць навіны, новыя фарматы, ролю анлайн-платформаў і штучнага інтэлекту;
• Залучаць прафесіяналаў(-ак) з медыя і сферы надзейнасці інфармацыі, кантэнт-мейкераў(-ак) і інфлюэнсераў(-ак), геймераў(-ак), мастакоў(-чак);
• Пераходзіць культурныя, нацыянальныя або моўныя межы;
• Абапірацца на найлепшыя практыкі нядаўніх праектаў медыяграматнасці і пашыраць іх.

Праект трэба пабудаваць на аналізе патрэбаў мэтавых краін і груп: апісаць патрэбы і праблемы, зрабіць карту ініцыятываў, якія ўжо існуюць, і растлумачыць, як праект адкажа на патрэбы і дасягне мэтавых груп. Трэба ўлічваць краіны і рэгіёны з асаблівымі праблемамі — нізкім узроўнем медыяграматнасці або сур'ёзнымі пагрозамі свабодзе і плюралізму медыя.

Перавагу аддаюць ініцыятывам з шырокім ахопам або для груп, да якіх праграмы медыяграматнасці амаль не даходзяць, — найперш дарослым па-за сістэмай адукацыі. Арганізатары раяць супрацоўнічаць з рэгіянальнымі хабамі European Digital Media Observatory (EDMO).

Для заяўкі патрэбныя:

• Частка A — адміністрацыйныя звесткі пра ўдзельнікаў і зводны бюджэт (запаўняецца анлайн);
• Частка B — апісанне праекта па шаблоне з сістэмы падачы, да 50 старонак;
• Частка C — дадатковыя даныя пра праект і яго ўнёсак у паказчыкі праграмы (запаўняецца анлайн);
• Калі праект выкарыстоўвае штучны інтэлект — апісанне тэхналогіі (тып, умовы ліцэнзіі, кошт), абгрунтаванне выбару і раздзел пра адпаведнасць правілам, этыку, бяспеку даных, чалавечы кантроль і празрыстасць.

Як падавацца:

Толькі праз сістэму падачы на EU Funding & Tenders Portal(знешні сайт). Да падачы ўсім удзельнікам трэба стварыць рахунак EU Login і зарэгістраваць арганізацыю ў Participant Register, каб атрымаць 9-значны код PIC. Каардынатар падае заяўку ад імя ўсяго кансорцыума. Паперовыя заяўкі не прымаюць.

Адбор:

Заяўкі ацэньвае камісія з удзелам незалежных экспертаў(-ак) па 100-бальнай шкале: адпаведнасць мэтам конкурсу — 40 балаў, якасць зместу і дзейнасці — 30, кіраванне праектам — 10, распаўсюд вынікаў і ўплыў — 20. Каб прэтэндаваць на грант, трэба набраць мінімум 70 балаў.

Таймлайн:

• Ацэнка — люты – чэрвень 2027 года;
• Вынікі — ліпень 2027 года;
• Падпісанне грантавай дамовы — кастрычнік 2027 года.

Кантакт:

Пытанні пра конкурс — EACEA-CREATIVE-EUROPE-MEDIA-LITERACY@ec.europa.eu; тэхнічныя пытанні пра партал — у IT Helpdesk.

Арганізатар:

Еўрапейская камісія, праграма Creative Europe (кірунак Cross-sectoral). Конкурсам кіруе European Education and Culture Executive Agency (EACEA).

Важна:

• Конкурс залежыць ад канчатковага зацвярджэння бюджэту ЕС на 2027 год — пры істотных зменах яго могуць змяніць або скасаваць;
• Калі пры падрыхтоўцы заяўкі выкарыстоўваеце генератыўны ШІ, трэба праверыць змест і раскрыць, якія інструменты і як вы выкарыстоўвалі.