Для каго: людзі, якія хочуць два гады працаваць над сваім даследаваннем харэаграфічнага і адначасова разам «харэаграфаваць» саму школу. Набор адкрыты міжнародна — і для брытанскіх, і для замежных заяўнікаў(-ц), без абмежаванняў па грамадзянстве.

• Ад 18 гадоў, верхняй узроставай межы няма;
• Не абавязкова ідэнтыфікаваць сябе як мастака(-чку) ці харэографа(-фку) — школа адкрытая да любой даследчай практыкі, звязанай з харэаграфічным, мастацкай або немастацкай;
• Даследаванне не мусіць быць аднаасобным ці сольным, не мусіць уключаць танец і не мусіць быць пра рух чалавечага цела;
• Дыскусія ў школе ідзе на постдыпломным узроўні, але заяўкі ад людзей без традыцыйнай мастацкай або акадэмічнай адукацыі вітаюцца;
• Школа не можа падтрымаць тых, хто адначасова вучыцца дзесьці на поўнай стаўцы.

Пра праграму:

Rose Choreographic School — эксперыментальны даследчы і педагагічны праект на базе Sadler's Wells East у Лондане. Каманду школы (яе называюць Faculty) складаюць двое: Martin Hargreaves, Head of School, і Izzy Galbraith, Producer. Раз на два гады школа набірае Artistic Cohort — групу даследчыкаў(-ц).

Школа адрознівае харэаграфію (стварэнне аўтарскіх танцавальных твораў) і харэаграфічнае — шырэйшыя працэсы мыслення і працы з сістэмамі, стаўленнямі і схільнасцямі да арганізацыі руху. Тут не вучаць рабіць танцы: пытанне ў тым, што адбываецца, калі людзі збіраюцца разам, каб думаць пра харэаграфічнае. Няма ні сілабуса, ні праграмы, ні чаканага загадзя выніку — школа свядома дае сябе «харэаграфаваць» усім, хто з ёй узаемадзейнічае.

Што прапануецца:

• Даследчы бюджэт 15 000 GBP ≈ 17 480 EUR на два гады, які выплачваецца штомесячнымі стыпендыяльнымі траншамі;
• Доступ да танцавальных студый у Sadler's Wells East;
• Ментарская і вытворчая падтрымка: Martin дае драматургічную падтрымку, ментарства і крытычны фідбэк, Izzy — адміністрацыйную і прадусарскую, у тым ліку бюджэтаванне, планаванне і кантрактаванне;
• Індывідуальны план падтрымкі, які Faculty складае з кожным(-ай) удзельнікам(-цай) і ўзгадняе па меры таго, як мяняюцца патрэбы практыкі;
• Кампенсацыя дарогі ў Лондан і пражывання на ўвесь час кожнага збору кагорты;
• Магчымасць публікаваць даследчыя матэрыялы на сайце школы і ў яе сацсетках.

Важна пра фармат: школа не прадусуе і не паказвае гатовыя сцэнічныя творы ў Sadler's Wells. Гэта рамка, каб распакоўваць і даследаваць пытанні, а не рабіць прэм'еры.

Што чакаецца ад удзельнікаў(-ц):

Faculty і кагорта рэгулярна збіраюцца фізічна ў Sadler's Wells East на Cohort Assemblies — па 8 дзён кожныя два месяцы цягам усяго цыклу. Праграму гэтых збораў — варкшопы, лекцыі, шэрынгі, семінары, запрошаныя госці, паходы на чужыя паказы і выставы — Faculty і кагорта плануюць разам. Актыўны ўдзел значыць таксама працу з калектыўнымі рашэннямі, этыкай, супольнай адказнасцю, нязгодай і групавым самакіраваннем; кагорта і Faculty разам пішуць жывы дакумент Ethics of Practice. Ад удзельнікаў(-ц) просяць запоўніць Access Rider — жывы дакумент пра патрэбы даступнасці, які вызначае, як з імі працаваць.

Каляндар збораў кагорты:

• 1–8 красавіка 2027 года;
• 5–12 чэрвеня 2027 года;
• 14–21 жніўня 2027 года;
• 9–16 кастрычніка 2027 года;
• 4–11 снежня 2027 года;
• 12–19 лютага 2028 года;
• 8–15 красавіка 2028 года;
• 24 чэрвеня — 1 ліпеня 2028 года;
• 9–16 верасня 2028 года;
• 11–18 лістапада 2028 года;
• 13–20 студзеня 2029 года;
• 24–31 сакавіка 2029 года.

Пераязджаць у Лондан не трэба, але прыязджаць на зборы — трэба. Faculty разумее, што графікі часам не сыходзяцца, і складае з кожным(-ай) асобны план прысутнасці; пры гэтым прысутнасць на зборах настойліва рэкамендаваная.

Як падавацца:

Праз форму заяўкі на сайце школы. Трэба адказаць на два пытанні:

• What is your choreographic research? (У чым ваша харэаграфічнае даследаванне?);
• What is your interest in collaboratively choreographing a School? (Што вас цікавіць у сумесным «харэаграфаванні» школы?).

Адказ можна падаць тэкстам, аўдыязапісам або відэа — на кожную частку ў форме ёсць ліміт словаў або часу. Школа просіць трымацца менавіта пытання і не дасылаць CV, партфоліа ці доўгія апісанні кар'еры.

Дэдлайн:
20 верасня 2026 года, 23:00 па брытанскім часе (BST).

Этапы адбору:

• Разгляд заявак — з 21 верасня 2026 года да студзеня 2027 года;
• Усім заяўнікам(-цам) паведамляюць вынік — да канца студзеня 2027 года;
• Запрашэнні на размову тым, хто ў шорт-лісце — канец студзеня 2027 года;
• Размовы, анлайн — люты 2027 года;
• Прапановы — сакавік 2027 года;
• Абвяшчэнне складу кагорты — красавік 2027 года;
• Першы збор кагорты — 1–8 красавіка 2027 года.

Арганізатар:
Rose Choreographic School — эксперыментальны даследчы і педагагічны праект на базе Sadler's Wells East, Rosebery Ave, Лондан EC1R 4TN, Вялікабрытанія.