Для каго:

Прафесіяналы(-кі) з досведам працы і лідарства, якія хочуць вучыцца ў магістратуры ў Швецыі. Падавацца могуць грамадзяне(-кі) 34 краін: Арменіі, Азербайджана, Бангладэш, Беларусі, Балівіі, Бразіліі, Калумбіі, Эквадора, Егіпта, Эфіопіі, Грузіі, Гватэмалы, Інданезіі, Ірака, Іарданіі, Кеніі, Ліберыі, Малайзіі, Мексікі, Малдовы, Марока, Нігерыі, Перу, Філіпін, Руанды, Сенегала, ПАР, Танзаніі, Тайланда, Уганды, Украіны, Узбекістана, В'етнама і Замбіі.

Жыць у краіне грамадзянства на момант падачы не абавязкова.

Трэба:

• Падаць заяўку на магістарскую праграму са спісу праграм для стыпендыі SI(знешні сайт, адкрываецца ў новай укладцы);
• Быць абавязаным(-ай) плаціць за навучанне ў Швецыі — калі стыпендыю дадуць, навучанне аплаціць SI;
• Быць залічаным(-ай) або ўмоўна залічаным(-ай) на праграму са спісу ў дзень вынікаў залічэння — 1 красавіка 2027 года;
• Мець пацверджаны досвед працы: поўная або частковая занятасць, фрыланс ці ўласная справа. Для грамадзян(-ак) Арменіі, Азербайджана, Беларусі, Грузіі, Малдовы і Украіны мінімуму гадзін няма, але перавага аддаецца больш вопытным кандыдатам(-кам). Для астатніх краін — не менш за 3 000 гадзін да лютага 2027 года, максімум ад трох працадаўцаў;
• Мець досвед лідарства — на цяперашняй ці мінулай працы, у прадпрымальніцтве або ў грамадзянскай супольнасці. Пад лідарствам SI разумее кіраванне камандамі або арганізацыямі, уплыў на стратэгію арганізацыі, размеркаванне задач і ўдзел у прыняцці рашэнняў.

Цяпер працаваць не абавязкова. Мінімуму гадзін для досведу лідарства няма. Перавага аддаецца досведу працы ў галіне абранай праграмы і моцнаму досведу лідарства на працы.

Не могуць падавацца:

• Супрацоўнікі(-цы) дзяржаўнага сектара Беларусі і Грузіі;
• Людзі, якія цяпер вучацца ў шведскім універсітэце або ўжо маюць шведскі дыплом;
• Людзі, якія да пачатку стыпендыі (жнівень 2027 года) пражылі ў Швецыі ў суме два гады або больш;
• Тыя, хто ўжо атрымліваў стыпендыю Swedish Institute на навучанне ў Швецыі;
• Грамадзяне(-кі) Швецыі або краін ЕС/ЕЭЗ;
• Уладальнікі(-цы) шведскага сталага віду на жыхарства, а таксама часовага дазволу на працу і жыхарства, выдадзенага з-за працы або сямейных сувязяў з грамадзянінам(-кай) Швецыі ці ЕС/ЕЭЗ, які(-ая) мае права жыць у Швецыі;
• Людзі з другім грамадзянствам краіны, якой няма ў актуальным спісе атрымальнікаў афіцыйнай дапамогі на развіццё (DAC list of ODA recipients).

Выключэнні: грамадзяне(-кі) Украіны, якія жывуць у Швецыі паводле Дырэктывы аб часовай абароне, могуць падавацца. Грамадзяне(-кі) Малдовы з румынскім грамадзянствам таксама могуць падавацца, але ў заяўцы трэба пазначыць малдаўскае грамадзянства.

Фармат:

Вочная магістратура на англійскай мове ва ўніверсітэтах Швецыі на адзін або два гады, з восеньскага семестра 2027 года. Падыходзяць праграмы ў чатырох галінах: Governance (дзяржаўнае кіраванне), Public Health (грамадскае здароўе), Entrepreneurship and Innovation (прадпрымальніцтва і інавацыі) і STEM (прыродазнаўчыя навукі, тэхналогіі, інжынерыя і матэматыка).

У спісе на 2027/2028 год — 515 праграм у 30 універсітэтах і вышэйшых школах. Найбольш праграм у Lund University (81), Uppsala University (59), Stockholm University (51), KTH Royal Institute of Technology (50) і Chalmers University of Technology (36). Большасць праграм двухгадовыя (120 крэдытаў), ёсць і аднагадовыя (60 крэдытаў). Апроч тэхнічных і прыродазнаўчых, у спісе ёсць праграмы па архітэктуры і ўрбаністыцы, дызайне (напрыклад, Spatial Design у Konstfack, Industrial Design у Lund University, Interaction Design у Malmö University і Umeå University), бізнесе і менеджменце, праве, палітычных навуках і грамадскім здароўі. Поўны спіс з назвамі і кодамі праграм — PDF-файл(знешні сайт, адкрываецца ў новай укладцы). Звярайце назву і код праграмы: у некаторых праграм ёсць аднагадовы і двухгадовы варыянт з рознымі кодамі.

Што прапануецца:

• Поўная аплата навучання — Swedish Institute плаціць універсітэту напрамую кожны семестр;
• Стыпендыя на пражыванне — 12 000 SEK (≈ 1 090 EUR) у месяц на ўвесь час навучання;
• Аднаразовы грант на дарогу — 15 000 SEK (≈ 1 360 EUR); для стыпендыятаў(-ак) з Арменіі, Азербайджана, Беларусі, Грузіі, Малдовы і Украіны — 10 000 SEK (≈ 910 EUR); тым, хто ўжо жыве ў Швецыі, грант не выплачваюць;
• Членства ў SI Network for Global Professionals (NFGP) — сетцы стыпендыятаў(-ак) Swedish Institute для прафесійнага развіцця і нетворкінгу;
• Пасля стыпендыі — членства ў Sweden Alumni Network, alumni-сетцы для далейшага нетворкінгу і развіцця.

Колькі каштуе ўдзел:

Каб падацца на магістарскія праграмы, трэба своечасова аплаціць збор University Admissions; стыпендыя гэты збор не пакрывае. Памер збору на старонцы стыпендыі не пазначаны — праверце яго на сайце University Admissions.

Для заяўкі патрэбныя:

Для CV, пацвярджэння досведу і рэкамендацыйных лістоў абавязкова трэба выкарыстоўваць шаблоны SI на 2027/2028 навучальны год; шаблоны мінулых гадоў не прымаюць. Уся заяўка — на англійскай мове.

• CV па шаблоне SI — не больш за тры старонкі, Лішнія старонкі не ацэньваюць;
• Пацвярджэнне досведу працы і лідарства па шаблоне SI: форму запаўняюць на камп'ютары, раздрукоўваюць, падпісвае чалавек, які пацвярджае досвед, і завяраюць афіцыйнай пячаткай арганізацыі або натарыуса; загружаюць адным PDF-файлам;
• Два рэкамендацыйныя лісты па шаблоне SI ад двух розных людзей: адзін — абавязкова пра досвед працы, другі — пра працу або дзейнасць па-за ёй. Плюсам будзе, калі другі ліст пра прадпрымальніцтва або ўдзел у сетках і арганізацыях грамадзянскай супольнасці. Лісты набіраюць на камп'ютары, раздрукоўваюць, падпісваюць, завяраюць афіцыйнай пячаткай арганізацыі або натарыуса, сканіруюць і загружаюць адным PDF-файлам;
• Копія сапраўднага пашпарта або ID-карты, дзе добра відаць імя, грамадзянства і фота;
• Матывацыя — яе пішуць на партале падачы.

Некаторых кандыдатаў(-ак) выпадкова абіраюць, каб яны запісалі кароткае відэапрадстаўленне. Калі не выканаць інструкцыі (не той шаблон, няма пячаткі, няпоўны пакет), заяўку дыскваліфікуюць. Іншыя дакументы, акрамя пералічаных, не разглядаюць.

Як падавацца:

Падача ў два крокі — без першага другі немагчымы:

1. Да 15 студзеня 2027 года падайце заяўку на магістарскую праграму (можна да чатырох праграм) праз шведскую сістэму University Admissions(знешні сайт) і аплаціце збор. Вы атрымаеце асабісты нумар заяўкі з васьмі лічбаў — захавайце яго: калі ў заяўцы на стыпендыю пазначыць няправільны нумар, яе дыскваліфікуюць;
2. 8–24 лютага 2027 года падайце адну заяўку на стыпендыю на партале Swedish Institute — з адным камплектам дакументаў і да чатырох праграм са спісу. У апошні дзень партал зачыняецца а 14:59 CET.

Stockholm School of Economics і Konstfack вядуць уласны набор, і нумара заяўкі ад University Admissions для іх няма. Праграму адной з гэтых школ можна дадаць у заяўку на стыпендыю пятай. Арганізатары(-кі) раяць не чакаць апошніх дзён: у канцы перыяду партал перагружаны, а пасля дэдлайну заяўкі не прымаюць.

Адбор:

Пасля дэдлайну Swedish Institute правярае, ці адпавядаюць заяўкі ўмовам, і дыскваліфікуе няпоўныя або аформленыя не па інструкцыі.

Шукаюць прафесіяналаў(-ак), якія маюць магчымасці, уласную пляцоўку і імкненне паспрыяць развіццю сваёй краіны і рэгіёна. У заяўцы трэба ясна паказаць, як навучанне паспрыяе ўстойліваму развіццю вашай краіны і з якімі мэтамі ўстойлівага развіцця звязаныя абраныя праграмы. Якасць заяўкі вырашальная.

Далей разглядаюць толькі тых, хто 1 красавіка 2027 года залічаны або ўмоўна залічаны на праграму са спісу і не змяняў вынікі залічэння (напрыклад, не адмаўляўся ад месца). Рэзерв і спіс чакання не ўлічваюцца, позняга залічэння для стыпендыі няма: стыпендыю даюць толькі на праграму, куды залічылі ў першы дзень.

У канчатковым адборы SI імкнецца да гендарнага балансу і да таго, каб былі прадстаўленыя як мага больш краін, калі ёсць дастаткова якасных заявак, а таксама ўлічвае бюджэт. Квот па краінах, галінах і ўніверсітэтах няма. Кандыдатак, якія падыходзяць і пад стыпендыю Pioneering Women in STEM, разглядаюць у абедзвюх праграмах.

Таймлайн:

• Да 15 студзеня 2027 года — падача на магістарскія праграмы праз University Admissions;
• 8–24 лютага 2027 года, да 14:59 CET — заяўка на стыпендыю;
• 25 лютага – 31 сакавіка 2027 года — праверка і ацэнка заявак;
• 1 красавіка 2027 года — вынікі залічэння ад University Admissions;
• 22 красавіка 2027 года — SI абвяшчае стыпендыятаў(-ак) на si.se. Паведамляюць толькі тым, хто атрымаў стыпендыю;
• Канец красавіка 2027 года — афіцыйная прапанова па электроннай пошце. Яе трэба прыняць або адхіліць у тэрмін, пазначаны ў лісце.

Кантакт:

Swedish Institute: si@si.se, +46-8-453 78 00. З пытаннямі пра падачу на магістратуру, залічэнне, збор і нумар заяўкі звяртайцеся ў University Admissions.

Арганізатар:

Swedish Institute (SI) — шведскае дзяржаўнае агенцтва, якое развівае міжнароднае супрацоўніцтва і цікавасць да Швецыі. Стыпендыя Global Professionals рыхтуе людзей, якія будуць працаваць на ўстойлівае развіццё сваіх краін.

Важна:

• Не ўсе магістарскія праграмы даюць права на стыпендыю — перад падачай праверце, ці ёсць ваша праграма ў спісе на 2027/2028 год;
• Падача на магістратуру праз University Admissions мае ўласныя ўмовы і тэрміны — праверце іх на сайце сістэмы;
• Стыпендыя не пакрывае страхоўку (што пакрывае ўніверсітэт, варта ўдакладніць у ім), выплаты на членаў сям'і і збор University Admissions;
• Змяніць праграму, падоўжыць або перанесці стыпендыю нельга;
• Калі ў вас два грамадзянствы з ліку краін-удзельніц, падавайцеся толькі па адным: калі падаць некалькі заявак праз розныя грамадзянствы, дыскваліфікуюць усе;
• SI — дзяржаўнае агенцтва, таму ўсе заяўкі, якія яно атрымлівае, паводле шведскага прынцыпу адкрытага доступу да інфармацыі лічацца публічнымі дакументамі. Асабістыя даныя апрацоўваюцца паводле GDPR.