Для каго: невялікія некамерцыйныя і няўрадавыя арганізацыі ў краінах ЕС, якія працуюць з мігранткамі, уцякачкамі і жанчынамі з дыяспарных супольнасцей.

Падавацца могуць:

• Арганізацыі, створаныя мігранткамі або ўцякачкамі і заснаваныя на правах чалавека;
• Нізавыя жаночыя праваабарончыя арганізацыі з асобнай праграмай для мігрантак / уцякачак;
• Мігранцкія, уцякацкія або дыяспарныя арганізацыі з асобнай праграмай для жанчын;
• Нізавыя праваабарончыя арганізацыі з асобнай праграмай для мігрантак, уцякачак або жанчын з дыяспары.

Асноўныя патрабаванні:

• Арганізацыя павінна быць зарэгістраваная ў краіне ЕС;
• Гадавы аперацыйны бюджэт за апошні закрыты фінансавы год — менш за 300 000 EUR;
• Мінімум 1 год дзейнасці, у тым ліку можа ўлічвацца перыяд да юрыдычнай рэгістрацыі;
• Незалежнасць ад палітычных і рэлігійных партый, груп або дзяржаўных органаў;
• Пацверджаны досвед працы з мігранткамі, уцякачкамі або жанчынамі з дыяспары;
• Жанчыны павінны складаць істотную частку кіраўнічых і выканаўчых структур: ад 50% да 80% у залежнасці ад тыпу арганізацыі.

Можна падавацца адной арганізацыяй або партнёрствам да 3 арганізацый.

Прыярытэты:

1. Падтрымка і ўзмацненне мігрантак і ўцякачак

• Інфармаванне пра правы і абавязкі ў межах заканадаўства ЕС і нацыянальнага права;
• Доступ да прававой дапамогі, механізмаў абароны і правасуддзя;
• Праца з тэмамі дыскрымінацыі, гвалту, здароўя, ментальнага здароўя, рэпрадуктыўных правоў;
• Развіццё самапрадстаўніцтва, самаадвакацыі і грамадзянскага ўдзелу.

2. Адвакацыя фундаментальных правоў мігрантак і ўцякачак

• Маніторынг і дакументаванне парушэнняў правоў;
• Падрыхтоўка справаздач і shadow reports;
• Кампаніі пра правы чалавека і лепшыя практыкі;
• Даследаванні і інфармацыйныя матэрыялы пра занятасць, адукацыю, жыллё, здароўе, грамадзянскі ўдзел і доступ да рэсурсаў.

3. Удзел мігрантак і ўцякачак у дэмакратычным дыялогу

• Супольнасныя акцыі, дыялогі і мастацкія інтэрвенцыі;
• Прасоўванне ролі мадэляў і пазітыўнага ўнёску мігрантак;
• Кампаніі супраць палярызацыі і міжсупольнасных канфліктаў;
• Узмацненне ролі мігрантак у палітыцы, прыняцці рашэнняў і лакальным грамадскім жыцці;
• Стварэнне фармальных або паўфармальных сетак жаночых мігранцкіх арганізацый.

Даступныя тры тыпы грантаў:

• Micro grants — 17 778 EUR;
• Small grants — 32 778 EUR;
• Medium grants — 60 000 EUR.

Фінансаванне пакрывае 100% бюджэту, суфінансаванне не патрабуецца.

Выплаты:
• 90% пасля падпісання грантавай дамовы;
• 10% пасля завяршэння праекта, праграмы ўзмацнення патэнцыялу і падачы справаздач.

Максімум, які адна арганізацыя можа атрымаць ва ўсіх цыклах RIZA, — 60 000 EUR.

Што можа пакрывацца:

• Заробкі і аплата працы каманды праекта;
• Частка офісных выдаткаў, інтэрнэт, тэлефон;
• Матэрыялы, абсталяванне і праграмнае забеспячэнне для праекта;
• Арэнда прасторы і кейтэрынг;
• Выдаткі на догляд дзяцей;
• Дарога, пражыванне і суткавыя для праектных паездак;
• Удзел у абавязковым афлайн-варкшопе RIZA;
• Ганарары экспертам(-кам), кансультантам(-кам) і падрадчыкам — да 20% бюджэту;
• Камунікацыя і распаўсюд вынікаў.

Першы этап — анлайн-форма і падпісаная дэкларацыя.

Калі арганізацыю запросяць на другі этап, трэба будзе падаць:

• Дакументы пра юрыдычны статус або фармалізацыю арганізацыі;
• Пацверджанне дзейнасці: справаздачы, фота, пасты ў сацсетках або іншыя матэрыялы;
• Фінансавую справаздачу за апошні закрыты фінансавы год.

Заяўкі рэкамендуецца падаваць па-англійску, але прымаюцца таксама заяўкі на адной з 24 моў ЕС краіны заяўніка.

Арганізатары: RIZA — Building European Democracy with Women of Migrant Descent.