Для каго: шукаюць траіх кваліфікаваных аўтараў(-ак) з прафесійным досведам:

• Толькі асобныя аўтары(-кі) — дуэты і калектывы не бяруць;
• Дысцыпліны: саўнд-арт, даследаванні гуку (sound studies), аўдыявізуальнае мастацтва, эксперыментальнае стварэнне інструментаў, візуальнае мастацтва, інсталяцыі, скульптура, ленд-арт, перформанс;
• Чыста гукавыя інсталяцыі без візуальнага вымярэння не разглядаюцца.

Тэма 2027 года — KLATSCH. У нямецкай мове Klatsch можа азначаць і пляск, і гук удару, і чутку, і плёткі. Фестываль пытаецца, што звязвае сённяшнія фэйкі ў сацсетках з гісторыямі, якія восемсот гадоў таму пераносілі з замка ў замак гандляры, паломнікі і музыкі: інфармацыя ператвараецца ў гісторыі, гісторыі — у памяць, а часам чутка пачынае ствараць рэальнасць. Замак становіцца камерай, дзе гукі сучаснасці сустракаюцца з рэхам мінулага.

Даты:

• Рэзідэнцыя: з 17 траўня да 27 чэрвеня 2027 года (пяць тыдняў);
• Фестываль: 17–26 чэрвеня 2027 года (дзесяць дзён). Арганізатары просяць рэзідэнтаў(-ак) быць на месцы ўвесь час фестывалю.

Што прапануецца:

• Ганарар (Grant): 4 000 CHF ≈ 4 240 EUR;
• Дарога, транспарт і харчаванне: 1 000 CHF ≈ 1 060 EUR;
• Матэрыялы: да 1 000 CHF ≈ да 1 060 EUR;
• Пражыванне: траіх стыпендыятаў(-ак) селяць у гістарычным доме ў Штэтлі (Städtli) — маленькім мястэчку каля падножжа замка. У кожнага(-ай) свой пакой на ўвесь час рэзідэнцыі, кухня, гасцёўня і невялікі санвузел — агульныя;
• Бясплатны ўваход на ўсе падзеі фестывалю;
• Некаторыя выставачныя памяшканні замка можна заняць загадзя — калі дазволяць абставіны.

Рэзідэнты(-кі) абавязаныя прывезці ўласныя ключавыя інструменты — апаратуру, праграмы, тэхнічнае абсталяванне, спецыяльны інструмент.

Што чакаецца ад удзельнікаў(-ц):

• Працаваць над работай (ці над яе часткай) на месцы падчас рэзідэнцыі;
• Работа мусіць быць скончаная да адкрыцця фестывалю;
• Прадстаўляць створанае групам, якія ходзяць па замку з экскурсіямі, і ўдзельнічаць у публічных размовах падчас фестывалю;
• Яшчэ да адкрыцця выставы правесці прынамсі адну экскурсію з расказам пра сваю працу;
• Жыць і працаваць у замку і ў Штэтлі — арганізатары лічаць гэта прынцыповым для паказу;
• Быць гатовымі да рэпетыцый, мантажу і часова закрытых зон: замак працуе як музей і застаецца адкрытым для наведвальнікаў(-ц).

Кантакт з жыхарамі(-камі) мястэчка і наваколля вітаецца, а іх удзел у працы — магчымы.

Арганізатар:
Festival Schlossmediale, замак Вердэнберг, кантон Санкт-Гален, Швейцарыя. Паводле швейцарскага каталога культурнага фінансавання праграму вядзе аб'яднанне Verein Schloss Werdenberg (Städtli 31, 9470 Werdenberg).