Праграма адкрытая для тых, хто працуе ў візуальных мастацтвах, куратарстве, літаратуры, музыцы, архітэктуры і дызайне.

• Падавацца трэба з праектам;
• Дзве пляцоўкі. У Стамбул запрашаюць тых, хто жыве па-за Стамбулам і па-за Турцыяй:. У Айвалык — наадварот, тых, хто «жыве ў Стамбуле або мае трывалыя сувязі з культурнай і мастацкай супольнасцю Стамбула», а ад іх праектаў чакаюць сувязі з рэгіёнам;
• Этап кар'еры як умова не прапісаны, але пляцоўкі апісаныя па-рознаму: Енікёй — «especially for emerging and established artists», Айвалык — для аўтараў(-ак) сярэдняга і сталага этапу, якія хочуць паглыбіць працяглы праект.

Працягласць:

• Стамбул, Енікёй: ад 4 да 12 тыдняў;
• Айвалык: толькі 4 тыдні. Пляцоўка працуе з траўня да снежня і прымае адначасова адну асобу або дуэт;
• Канчатковы тэрмін вызначаюць арганізатары пасля размовы з вамі.

Што прапануецца:

• Ні за падачу, ні за пражыванне плаціць не трэба;
• Стамбул: асобны пакой з асобным санвузлом, прасторныя агульныя рабочыя зоны сярод зеляніны, вытворчая майстэрня з базавымі інструментамі (цыркулярная і сталовая пілы, дрыль, шліфавальная машына, вуглавая шліфмашына, ручны інструмент), цалкам абсталяваная агульная кухня. Штотыднёвыя закупы базавых прадуктаў ад арганізатараў. Транспартная картка на 1 000 турэцкіх лір на тыдзень (≈ 18 EUR);
• Айвалык: ціхае адасобленае жыллё сярод прыроды, асобны пакой з санвузлом, рабочая прастора ўнутры жылля, трохразовае харчаванне штодня і адна паездка ў абодва канцы ў Айвалык і на востраў Джунда штодня;
• Доступ да мастацкіх майстэрань, навуковых лабараторый і бібліятэкі універсітэта Сабанджы — бясплатна, але паводле наяўнасці месцаў;
• Магчымасць правесці падзею для прафесійнай аўдыторыі; прасоўванне рэзідэнта(-кі) і праекта праз PR-план арганізацыі, друкаваны і лічбавы.

Ганарару, стыпендыі, суткавых і бюджэту на вытворчасць у гэтай праграме няма.

Што арганізатары не пакрываюць: візавы збор, авіябілеты і любыя міжнародныя ці міжгароднія перамяшчэнні, трансфер з аэрапорта, таксі і машыну з кіроўцам, выдаткі на вытворчасць работы. Міжнародная медыцынская страхоўка абавязковая і павінна пакрываць усю дарогу ў абодва канцы і ўвесь час побыту — яе трэба мець да прыезду.

Што чакаецца ад удзельнікаў(-ц):

• Працаваць менавіта над тым праектам, з якім вас узялі. Правіла жорсткае: калі вы захочаце заняцца іншым праектам ужо пасля пачатку, працягваць рэзідэнцыю вы не зможаце;
• Быць адкрытым(-ай) да зносін з мясцовымі культурнымі і мастацкімі дзеячамі(-камі);
• Удзел у відэа пра працэс, якое Gate 27 здымае ў канцы рэзідэнцыі;
• Прэзентацыя вынікаў у канцы праграмы;
• Запоўніць Health Declaration Form (алергіі, фобіі);
• Перадаць работу ў калекцыю Gate 27 (эскіз, малюнак, работу, тэкст ці справаздачу) — гэта заахвочваюць, але не патрабуюць.

Арганізатар:
GATE27 KÜLTÜR SANAT TURİZM VE DIŞ TİCARET A.Ş. Стамбульскі адрас: Yeniköy Mh. Türkbostan Sk. No:27, Sarıyer/İstanbul. Партнёр праграмы — універсітэт Сабанджы.