Для каго:

Творчыя людзі любых дысцыплін: візуальнага, лічбавага і гукавога мастацтва, сцэнічных мастацтваў, рамёстваў, дызайну, кіно, літаратуры, музыкі і іншых.

Арганізатары(-кі) чакаюць ад кандыдатаў(-ак):

• Досведу размяшчэнняў або рэзідэнцый, дзе вы працавалі з людзьмі не з мастацкага поля;
• Умення планаваць праекты і здаваць іх у тэрмін;
• Цікавасці да таго, як творчыя працэсы і мастацкае мысленне працуюць у розных кантэкстах;
• Досведу і цікавасці да ўстойлівых практык у тым, як вы ствараеце і паказваеце працы;
• Гатоўнасці да супрацы і даследчай цікаўнасці;
• Гатоўнасці і магчымасці праводзіць час з акадэмічнымі кіраўнікамі(-цамі) і арганізацыямі, якія прымаюць стыпендыю.

Фармат:

Тры стыпендыі. Кожная — даследчае размяшчэнне на 5 тыдняў у міждысцыплінарным даследчым або палітычным кантэксце. Час дзеляць паміж даследаваннем на месцы і працай над творам; яго можна правесці адным блокам або расцягнуць на некалькі месяцаў. Тэрміны ўзгадняюць з камандай, якая прымае стыпендыята(-ку). Праект трэба завяршыць паміж студзенем і кастрычнікам 2027 года — ганарар разлічаны на гэты перыяд.

Месца і час па тэмах:

• Тэма 1 — Centre for Environmental Intelligence (CEI), University of Exeter. Праца пераважна ў CEI на кампусе Streatham; магчымыя выезды на пляцоўкі, звязаныя з даследаваннямі клімату і здароўя, на паўднёвым захадзе Англіі. Кіраўніца — Mayra Rodriguez. Графік узгадняюць пасля інтэрв'ю;
• Тэма 2 — каманда Nature Towns and Cities у National Trust. Стыпендыят(-ка) можа базавацца ў любым месцы Вялікабрытаніі. Частку працы можна рабіць дыстанцыйна, але гатоўнасць ездзіць абавязковая: праца, хутчэй за ўсё, будзе звязаная з канкрэтнымі месцамі і супольнасцямі. Асноўную працу плануюць на вясну і лета 2027 года, калі гэта зручна стыпендыяту(-ке). Кіраўніца — Amelia Browne;
• Тэма 3 — Natural England. Можна працаваць і анлайн, і ўжывую; каманда хоча некалькі асабістых сустрэч і выездаў на аб'екты. Пажадана размеркаваць 5 тыдняў на 3–4 месяцы, а не працаваць адным блокам, — напрыклад, з сакавіка па чэрвень 2027 года. Кіраўніца — Penny Marno, Senior Specialist (Health and Social Science).

Тэма:

• Тэма 1. Collective Creativity: Connecting people, the environment & artificial intelligence. CEI будуе мадэлі штучнага інтэлекту на спадарожнікавых здымках, даных датчыкаў і кліматычных мадэлях. Каманда хоча даследаваць, якую ролю ШІ можа адыгрываць у тым, як мы разумеем асяроддзе і клапоцімся пра яго: ці можа экалагічны ШІ ўлічваць мясцовыя веды на ўмовах саміх людзей і як сумленна гаварыць пра экалагічны след вылічэнняў;
• Тэма 2. Nature, Value and Voice: Creative Inquiry into Urban Nature Investment. У Вялікабрытаніі ўсё больш інвестуюць у гарадскую прыроду як адказ на спёку, паводкі, страту біяразнастайнасці і няроўнасць у здароўі. Каманда пытаецца, хто вызначае каштоўнасць гарадской прыроды, чые веды ўплываюць на рашэнні і што губляецца, калі жыццёвы досвед ператвараюць у паказчыкі;
• Тэма 3. Re-imagining a nature and health service: A Creative Fellowship in Nature and Health. Natural England распрацоўвае план дзеянняў у сферы прыроды і здароўя. Каманда хоча з дапамогай творчай практыкі па-новаму пераводзіць даследаванні ў палітыку і практыку, наладзіць абмен ведамі паміж творцамі і супрацоўнікамі(-цамі) і знайсці новыя спосабы гаварыць з людзьмі пра прыроду і здароўе.

Што прапануецца:

• Бюджэт 6 000 GBP (≈ 7 080 EUR) на адну стыпендыю, з ПДВ — на ганарар за 5 тыдняў, абсталяванне, дарогу, пражыванне і вытворчыя выдаткі;
• Яшчэ 1 000 GBP (≈ 1 180 EUR) на распаўсюд вынікаў і працу з публікай; як іх выдаткаваць, вырашаюць разам з камандай;
• Дадатковыя выдаткі на фотаздымку, падрыхтоўку і правядзенне падзей, прасоўванне і распаўсюд вынікаў падтрымлівае каманда Net+ Centre;
• Асобны культурны прадзюсар(-ка), які(-ая) суправаджае кожны праект;
• Тэма 1: удзел у сустрэчах лабараторыі, варкшопах, семінарах і канферэнцыях CEI — Machine Learning for Earth Observation (чэрвень 2027 года) і Environmental Intelligence Conference (верасень 2027 года), дзе можна паказаць вынікі. Даныя і мадэлі цэнтра — спадарожнікавыя здымкі, даныя датчыкаў, логі энергаспажывання — могуць стаць матэрыялам для практыкі;
• 100 GBP (≈ 118 EUR) за ўдзел у інтэрв'ю.

Для заяўкі патрэбныя:

• Пісьмовы адказ на адну старонку: на якую тэму вы падаецеся і які ўнёсак можаце зрабіць ва ўзаемакарысны абмен ведамі і практыкай. Можна паказаць, як вы ўжо закраналі тэму ў сваіх працах;
• Да 6 выяваў працы або спасылка на адно відэа, калі гэта мае сэнс;
• CV.

Як падавацца:

Дашліце матэрыялы на netpositiveinfo@exeter.ac.uk з тэмай ліста «Creative Fellowship Application (Topic X)», дзе X — нумар тэмы. Памер ліста — да 10 МБ. Падацца можна толькі на адну тэму.

Адбор:

Стыпендыятаў(-ак) абіраюць па выніках анлайн-інтэрв'ю ў Teams. У камісіі кожнай стыпендыі — кіраўнік(-ца) праекта з боку прымаючай арганізацыі, прадстаўнік(-ца) каманды Arts and Culture University of Exeter і яшчэ адзін(-на) супрацоўнік(-ца) Net+ Centre. На кожную тэму — адна стыпендыя.

Арганізатар:

Net+ Centre for Health and Climate Solutions (Centre for Net Positive Health and Climate Solutions) — брытанскі даследчы цэнтр пра клімат і здароўе, які фінансуе UKRI. Партнёры стыпендый 2027 года — Centre for Environmental Intelligence (University of Exeter), National Trust (Nature Towns and Cities) і Natural England.